موضة قديمة

السلام عليكم انا قريت فاتحه من ٣ اسابيع وان شاء الله الخطوبه اخر ٨ عشان لها اخ مسافر هينزل اجازه ونعمل الخطوبه المهم فيه نقطه مخلياني متردد اني اكمل معاه ولا لا وحابب اخد رايكم فيها انا في الاتفاقات معروفه عندنا في القاهره ان العروسه بتجيب الاجهزه التلاجه والغساله والبوتجاز وغساله الأطباق واجهزه المطبخ ميكرويف وخلاط وغيره من الاجهزه ديه دلوقتي هي بتقولي ان باباها قبل ما يتوفى من ٥ سنين كان مجهزها وجايبلها الحاجات ديه كلها عشان بكون مطمن عليها وعشان الدنيا كانت بتغلى في الاسعار فهو جابهم وقتها وشالهم لها الله يرحمه طبعا الحاجات بالكراتين ومخرجتش منهم ولا اتفتحوا عشان كان معروف انهم هيتخزنوا
دلوقتي لما قالتلي الاتواع اغلبهم انا معترض عليهم ومش موافق بيهم غير ان فيه حاجات موضتها راحت واصبحت قديمه ونفس الشركات عملت موديلات أحدث بكتير وحاجات باللمس والتكنولوجيا اتغيرت خالص لاني انا دارس السوق كويس قبل ما اخد قرار الخطوبه وكنت مقرر الاجهزه اللي هخليهم يشتروها في جهاز اللي هخطبها
فقولتها انا فيه حاجات مش عجباني ممكن تغيرها قالتلي لا مينفعش ومعناش فلوس ندفعها في اجهزه تاني ولاسعار اضاعفت مرتين دلوقتي طيب يا بنت الناس الحاجات ديه مش عجباني قالتلي لما نتجوز ابقى غيرها برحتك ! ازاي يعني حاجات زي ديه همضي عليها في القايمه وبعدين ادفع انا فلوس لها تاني قالتلي مهو احنا هنكتبها بنفس الاسعار اللي اشترناها بيها ومعانا فواتير كل حاجه وراجعها بنفسك انا قولتلها الحاجات ديه متنفعش تخش بيتي وهي موديلات قديمه وشاوري الناس الكبيره وردي عليا هتعملوا ايه بس انا من جوايا مضايق وبقول لو مغيروش الاجهزه مش هكمل في الجواز لانهم المفروض كانوا استنوا لما تتخطب ويشتروا الاجهزه المناسبه للعصر اللي احنا فيه خاصة ان المراه ملهاش حق في اختيار الاجهزه وانواعها لان الرجل بيبقى فاهم وعارف ايه اللي يدخل بيته
انا كده غلطان ولا ده حق اصيل من حقوقي ؟